Psa 80 | YON | STEP | Yook ambo bi ye karub yeman. “Amob Weng Ongmoon ye Bingko Wuung” ye yook ye kiwaan yaambed wingki yeman. God yaningko kankooni ye yook Asafbed wongkoon. O Israeldan Oonimaabman, nub wengamberende. Yosef ye awoya ari kuu sibi oonemoon areb ben kinban winimaabman, engyus burawiib yi kidangkambed king ye dibere oonimbon ari diberewenman kui, eb kuu yure.

Psalms 80

Yook 80

Yook ambo bi ye karub yeman. “Amob Weng Ongmoon ye Bingko Wuung” ye yook ye kiwaan yaambed wingki yeman. God yaningko kankooni ye yook Asafbed wongkoon.

1 O Israeldan Oonimaabman, nub wengamberende.
Yosef ye awoya ari kuu sibi oonemoon areb ben kinban winimaabman,
engyus burawiib yi kidangkambed king ye dibere oonimbon ari diberewenman kui, eb kuu yure.
2 Efraima Benjamina Manaseya yi arinambo ari kuu eb aromkono korokbe.
Yaro dembe nub kuu arudbon yaa burudande binde!
3 O God, yumbon kanduwen kwarimbed komburuwen kuu ebbed nub ongmendebko ika kandem.
Eb murubia kuu nub yaa konde.
Kwananeeb kuu nub kuu arudbon yaa burudande bindaneeb.
4 O Ana Nangmidan Yemoon YeYariman God,
aron komoyiib eb nimakarub yi kurikuri kebendeneb
yi yaa norin wandundaneeb?
5 Ebbed yi yaa kuu animan areb mimyob wandembiri yeman kondimaab,
kwane yi mimyob wandembiri yeman kuu meneki wongdemaombed kumundinmo kondewen.
6 Ebbed nub kuu ongmendeewa nub dia doriibdanbed nub yaa manmo kerundimaib,
kwane nub bondanbed nub yaa damangkandimaib kii.
7 O Ana Nangmidan Yemoon Ye God, yumbon kanduwen kwarimbed komburuwen kuu ebbed nub ongmendebko ika kandem.
Eb murubia kuu nub yaa konde.
Kwananeeb kuu nub kuu arudbon yaa burudande bindaneeb.
8 Eb kuu nong yob kab kuu Idyip aombed kanmeneneb,
ambibkin yenadan yenburekoreb kwari kibinewen.
9 Okad kwari kuu ebbed kab kaini dowad arewen,
kwane kab kuu yumburum kubunebene dembe derendaroon.
10 Kwane aangko aangko kuu ye kubunbed dabunoon,
kwane ye nondong ye kubundem yirimbed at sidaa darewoob yemoon kuu doronoon.
11 Ye nondong kuu karamok darewoob angka danganabe weneboon,
kwane ye yumburum kuu ok Yufretes angka weneboon.
12 Eb komande ye kuuk kuu bongmeebkob,
kane kane dewenebiib kuu yi korem kuu nong yob kee wadmimaib?
13 Dura awon kiib ambimbed monmare arewa kerunaiwe,
kiib dingkanbed kuyaa anengkanabimaib.
14 O Ana Nangmidan Yemoon Ye God, nub yaa angkon ika mene!
Ewen arimbed yiri kerekne wedmende!
Nong keyaa kee keenombere oone,

15 kab eb dingki wiwi angkambed kibinewen kui,
amnindo ye nong kuk ebbed ongmeewa aromne kainoon kui.
16 Nong ebbed kibinewen kuu nare korariwen,
kwane amotbed nengkiwen kii.
Ebbed kamkono ongkandewen yaa kumbed yi kuu dukniwen.
17 Eb dingki wiwi angkambed doreen ye karub kuu eb dingki kwari kowe,
karub ye mingki kee ebka eb dowad aromnewen kui.
18 Kwananeeb kuu nub kuu eb yaa koronde wanaubban.
Nub kuu bobnemoon areb keruwen kowe ben aromkono konde.
Kwananeeb kuu ewaningko yaa baandanuub.
19 O Ana Nangmidan Yemoon YeYariman God, yumbon kanduwen kwarimbed komburuwen kuu ebbed nub ongmendebko ika kandem.
Eb murubia kuu nub yaa konde.
Kwananeeb kuu nub kuu arudbon yaa burudande bindaneeb.